أكيد دا سؤال يستحق الإجابة بالنسبة لكم
أقول لكم بقى احنا بنعمل إيه
اجتماعات .. على شوية رحلات ، و اللا يمكن حفلات .. و جايز مسابقات ؟؟؟
لا بقى دا احنا أكيد عالم فاضية
؟؟؟؟؟؟؟
إحنا زى كل الطلبة .. شايلين هم دراستنا ، مقدرين تعب أهلنا .. حاسين بالمسئولية ، و فوق دا كله عارفين احنا عايشين ليه ، غايتنا هى إرضاء ربنا و بذل كل اللى نقدر عليه فى سبيل الغاية دى ، فمش عجيب لو قمنا بعمل أخد من وقتنا و جهدنا كتير بجوار كم هائل من المذاكرة و أحيانا مسؤليات تانية
إحنا بنعمل كل حاجة ربنا بيقدرنا عليها .. و بنبقى فى قمة السعادة و الخوف ، و أكيد انتم عارفين بنخاف ليه
أكيد بنبقى خايفين من ربنا إنه يمنعها القبول ، أو يجعلها مع كل اللى بذلناه فيها هباء منثورا
نسأل الله أن يثبتنا ، و يقوى ظهورنا ، و يرزقنا الإخلاص فى القول و العمل ، و يرزقنا القبول إن شاء الله
الأحد، 16 سبتمبر 2007
كل سنة و احنا فى رمضان .. بنتغير
السلام عليكم
إزيكم يا شباب ؟؟
رغم إنى مش شايفة أى حد لحد الآن ، بس أكيد فيه أمل إن مدونتنا تشتغل و تجيب ثمرة
طبعا
كل سنة و انتم طيبين
.. النهارده 4 من الشهر الكريم
أيوة يعنى باقى من الزمن 26 يوم بس
ما تتخضوش اوى كدا
هنلحق نعمل فيهم حاجات كتير و نلحق بركب المعتوقين .. فقط إن كنا صادقين مع الله عز و جل
جددوا النية .. حددوا أهدافكم .. اكتبوا خطتكم ، .. و ليكن شعارنا فى رمضان " لن يسبقنا إلى الله أحد " ، تعالوا نتعاهد على إننا نتغير .. تعالوا نتعاهد على إننا نفتش فى عيوبنا كلها و نغير منها واحدة أو اتنين .. أو عشرة فى رمضان
تعالوا نستمر بعد رمضان ، و نحقق الفوز الحقيقى
ليه ما نسيبش الطرحة طويلة بعد رمضان ؟؟
ليه الشاب اللى بيبطل تدخين أو بيقلل فى رمضان ما يجاهدش نفسه و يبطل بقية عمره ؟؟
ليه ما نبطلش عصبية بعد رمضان ؟؟
ليه ما نبطلش غيبة و ثرثرات فارغة كنا سايبينها عشان رمضان ؟؟
هو إيه رمضان .. ؟؟
رمضان ما هو إلا أيام .. لو تغير إسم رمضان و زال عنها لبقيت بنفس معانيها
لو كان رمضان مجرد طقوس سنوية ، لكان الله فى غنى عن جوعنا و عطشنا
رمضان يا شباب معنى .. فكرة.. هدف .. إحساس بالله
رمضان صناعة إنسان .. صناعة حياة
لو انت أو انتى فى الكلية و هتقدمى مشروع التخرج بكرة ، بتسهرى طول الليل .. و مهما تحاولى النوم ما يجيش ، و يفضل دماغك يودى و يجيب ، شوية فى أهداف المشروع و حبة فى تنفيذه .. لآخر كل ما يتعلق بيه
طب لو قالوا لك بكرة كل واحد هيقدم مشروع خروجه من النار ، مشروع العتق .. مشروع حياته الخالدة فى دار النعيم .. هتعملى إيه ؟؟
هو دا بالظبط اللى بيحصل كل ليلة فى رمضان ، رب العباد بيعتق رقاب المخلصين الراغبين .. اما الساهرين على الأفلام و الفيديو كليبات .. ؟؟
يا شباب
ربنا ما قالش : كونوا رمضانيين
ربنا قال لنا : كونوا ربانيين
إخرج من رمضان بحياة جديدة و إحساس تانى ، و عيش الحياة بس لله
و لنكن جميعا
ربـــــــــــــــــــانيين
جنى الجنان
الثلاثاء، 11 سبتمبر 2007
" بسم الله "
يللا .. ندون
* * *
إلى أحبتى فى الله .. إلى كل أخواتى اللواتى جمعتنى بهن أحلى أيام العمر
إلى الجنود المجهولين فى مسيرة العطاء ، .. إلى الأتقياء الأخفياء
و إلى الذين يزرعون فى دنياهم كأنهم يعيشون أبدا ، و يعملون لأُخراهم كأنهم يموتون غدا
إلى المفعمين بالأمل رغم مرارة الأيام ، .. الموقنين رغم اشتداد الظلام
و إلى رواد أسرتنا و أخواتنا و زميلاتنا فى كليتنا
إلى من يحبون الله و رسوله
لكل هؤلاء
أهدى تدوينتنا
*****
جنى الجنان
الاشتراك في:
الرسائل (Atom)